大家好！我叫Francer, 我返咗以琳大約兩年啦！
原本我係一個佛教徒，因為我中學係讀佛教學校嘅，而我大家姐亦係佛教徒。咁點解我會信咗耶穌呢？
其實大約喺兩年前，我响工作上有好大壓力，個人好唔開心，好想尋求一個解決方法。咁啱我以前嘅同事Carol邀請我參加第7屆啟發課程。個課程其實係俾我哋了解同認識基督教信仰嘅，咁我就嘗試吓接觸教會啦！
當我返咗第一堂啟發課程後，我就鍾意咗呢度，因為呢度嘅感覺好似一個大家庭咁，一啲都唔陌生。而且我响啟發課程當中有好大感受，而呢種感受係以前响佛教裏面無嘅，就係『喜樂』！
以前去寺院得到嘅，只係平靜，而我返啟發課程唱歌敬拜得到嘅，係平安同喜樂。呢種感受大好多，係完全唔同嘅。所以我完成啟發課程後都一直keep住返小組同主日祟拜。
响這兩年幾裏面，神好保守我，對我有好多恩典。响工作方面，我都有祈禱想轉去另一個部門，跟住唔使兩個月就好快轉成咗啦！之後無咩工作壓力，個人都開心咗好多！就算公司搬大咗好多，工作量亦大好多，我都可以好積極咁面對……….
因為我記得聖經裏面講…..
『凡勞苦擔重擔的人，可以到我這裡來，我就使你們得安息。』( 馬太福音 11:28 )
所以我有咩都祈禱，有咩重擔都交俾耶穌，個人自然無咩壓力啦！哈哈！
我好開心有機會認識主耶穌，所以我喺今年四月受浸，成為一個真正的基督徒……亦都好開心今日可以响度同大家分享我嘅見證…….
最後我希望未認識主耶穌嘅您，都能夠嘗試去認識，一齊分享呢份平安同喜樂！
“感謝主”！
Francer
